Mag-uuma, nadakpan sa drug buy-bust operation

Gitingkagul na sa prisuhan ang suspek sa pagpayuhot sa illegal nga droga human nadakpan sa gipahigayong drug buy-bust operation sa mga kapulisan pasado alas 8:45 sa buntag kagahapon didto sa Purok-5, La Fortuna, Impasugong, Bukidnon.

Ang suspek giila nga si Antonio Belucura, 51 anyos, mag-uuma, number 4 sa PNP/PDEA Provincial list, ug residente sa Purok-3, La Fortuna, Impasug-ong, Bukidnon.

Narekober gikan sa suspek ang buy-bust item nga drogang shabu lakip ang P500 bill nga buy-bust money.

Samtang laing tulo ka mga pakete sa gituohang drogang shabu pa ang nakompiska sa mga otoridad nga mitambang og 0.16 gramos ug mukantidad og gibana-banang P1,088.00.

Gidala na sa Impasugong Municipal Police Station ang suspek nga nadakpan samtang ang mga ebidensyang nakompiska ang ipagaturn-over sa PNP Provincial Forensic Unit, Malaybalay City alang sa dugang eksiminasyon.

Kasong paglapas sa RA 9165 kon Comprehensive Dangerous Drugs Act of 2002 ang atubangon sa nadakpang suspek.

Facebook Comments