
Nananawagan si House Committee on Transportation Vice Chairperson at Quezon 3rd District Rep. Reynante Arogancia sa mga kaukulang ahensya ng gobyerno na tiyakin ang kaligtasan ng mga pasahero at riders ng transport network companies at motorcycle taxi laban sa cybercrimes.
Diin ni Arrogancia, nakababahala ang cybersecurity incident sa JoyRide dahil posibleng nakompromiso ang personal na impormasyon ng mga pasahero at riders nito.
Paliwanag ni Arrogancia, delikado ito dahil maaaring magamit ang mga nakaw na personal na impormasyon sa identity theft, phishing, online scams, at iba pang uri ng panloloko.
Bunsod nito ay nanawagan si Arrogancia sa Department of Transportation at Land Transportation Franchising and Regulatory Board na makipagtulungan sa National Privacy Commission at sa Department of Information and Communications Technology upang higpitan ang cybersecurity requirements para sa transport network companies at motorcycle taxi platforms.
Ayon kay Arrogancia, dapat maging bahagi ng accreditation at regular compliance monitoring sa TNVS at Motorcycle taxi ang cybersecurity audits, data protection safeguards, at malinaw na mga hakbang kapag may data breach.










