Ibajay, Aklan – Arestado it mga kapulisan ag Bantay Dagat rong magmanghod matapos nga magpatigayon it illegal fishing kahapon it hapon sa baybayon nga sakop it Brgy. Bugtong-Bato, Ibajay, Aklan.
Nakilaea rong magmanghod nga sanday Oliver Mahinay, 27-anyos, boat captain ag Bigboy Mahinay, 38-anyos tanan residente it Banica, Roxas City.
Sa pakikipag-angot mismo it RMN DYKR Kalibo News Team kay dating punong barangay it Bugtong-Bato ag makaron hay Chief it Bantay Dagat Ibajay nga si Teodorico Inguillo nga samtang una sanda sa medyo tower nanda tag makita ro mga baroto sa tunga it eawod ag naga tub-ok rong tubi sa kilid nga ginapatihan naga buhi it dinamita ag maeapit pa sa ginatawag nga ‘sanctuary’ o marine protected area nga hugot rong pagbawae sa pagpangisda.
Matapos nga raya anda makita insigida nga nag coordinate sanda sa Ibajay PNP ag ginkasa rong operation.
Tag maeapit eon lang sanda sa lugar nagtinguha pa nga i-areya ro andang mga baroto ag sigidas rong pag hueog nanda ko mga nadakpang isda para nga uwa it makitang ebidensya.
Nadakpan rong daywa ag narecover rong andang baroto, thermoses, banyera pilang bilog nga isda ag iba pang gamit sa pagpangisda samtang rong sa ibang baroto hay nakatigayon nga makapaeagyo.
Sa makaron hay temporaryo anay sanda nga ginkustodiya Ibajay PNP para sa nagakaigo nga disposisyon.
