Magtiayon sa Mati gipamusil sulod sa balay, 1 patay

169
Davao City – Padayon karong gipangita sa awtoridad ang mga suspek sa pagpusil sa magtiayon sa Purok Daisy, Sitio Kawitan, Barangay Buso, Mati City, Davao Oriental alas 7:30 sa gabii niadtong Martes (Enero 11, 2022).

Sa interbyu sa DXDC RMN Davao kang Police Corporal Jesiemar Lazaga, inbestigador sa Mati PNP, giila niini ang mga biktima nga sila Isabelita Carbonilla, 60-anyos, purok leader, kinsa dead on the spot human naigo sa ulo. Samtang ang bana mao si Juanito Carbonilla, 61-anyos, treasurer sa Cacao Association, nga recovering na karon sa hospital sa Tagum City human nakaangkon usab og seryusong injury.

Gibutyag sa naka-survive nga biktima nga anaa sa tulo (3) ka mga batan-on ang misulod sa ilang balay ug gilayong misibat gamit ang motorsiklo human sa insidente, diin personal grudge ang gilantaw karong motibo sa krimen.

“As per reveal sa naka-survive nga victim, ang mga suspek, more or less ang edad anaa sa.. mga batan-on pa. Naa nay (persons of interest). Actually, group ‘ni sila. Amo pa lang gi-follow up ang status nila,” sulti ni Lazaga.

Sa kasamtangan, dili pa ma-establisar kung tulis ang insidente bisan og nakuhaan og kwarta ang magtiayon tungod kay aduna gihapoy nahitabong pagpatay, diin adunay pipila ka anggulo ang gina-istudyohan karon sa kapulisan.

RadyoMaN Kirby Manzon

Facebook Comments