Magtutudlong taga Davao Del Sur, usa sa mga biktima sa MSU-Marawi explosion

Davao City – Nagbangutan ug walay kabutangan ang kasubo nga gibati karon sa pamilya ni Evangeline Aromin nga taga Bansalan, Davao del Sur human kining nalakip sa mga biktima sa pagpamomba sa Mindanao State University-Marawi Main Campus.

Si Evangeline Aromin, 31 anyos ug Physical Education teacher sa maong tulunghaan.

Sa post sa mga kabanay niini, pag-ampo ang ilahang gikinahanglan karon alang sa malinawong kapahulayan si Aromin ug sa hingpit makab-ot ang hustisya sa mga biktima.

Sa interview sa DXDC RMN Davao sa uyuan niining si Jepoy Igagamao, iyahang gibutyag nga muabot ang patay nga lawas ni Aromin karong December 6, 2023 sa Sitio Sto. Nino Brgy. New Clarin Bansalan, Davao del Sur.

Dugang pa nga naghulat na lang sila kung aduna bay tabang nga itunol ang MSU ug LGU sa pamilya ilabi na niserbisyo kini isip usa ka maestra.

Kahinumdoman nga si Aromin usa sa mga biktimang nakabsan og kinabuhi human nibusikad ang bomba sa Dimaporo Gymnasium samtang gihimo ang Catholic Student Mass niadtong dominggo sa buntag, December 3, 2023.

RadyoMaN Ivy Parido