Mandug PNP nakapatay og tulisan

Davao City – Wala pa’y aydintipikasyon hangtud karon ang giingong tulisan nga napatay sa hot pursuit operation nga gilusad sa Mandug Police Station nga nahitabo sa may sitio Lambo, Barangay Indangan, Buhangin District, Davao City 1:42 sa kadlawon.

Giingong unang namusil ang tulisan ngadto sa kapulisan sa Mobile #14 ug abtik nakalikay sa bala ang mga otoridad hinungdan nga paspas usab sila mibalos og pusil batok sa suspek resulta sa mga samad pinusilan nga nahiagoman niini.

Gisuwayan pa og dala sa Southern Philippines Medical Center ang maong tulisan apan dimalas kay gideklarang patay na kini sa doktor nga mihiling kaniya.

Ang mga sakop sa Scene of the Crime Operatives kon SOCO XI narekober og punto 45 nga pistola nga dunay usa ka magazine, empty shell sa 9mm, motorsiklo nga dunay sidecar, kapin tres mil ka pesos, cellophane, ug uban pang kagamitan gikan sa suspek.

Nasayran, milusad og hot pursuit operation ang Mandug PNP tungod sa pagpangayo og tabang sa usa ka traysikad driver nga si Bryan Meñiza, 29 anyos ug nagpuyo sa Saint Ignatius, Indangan human holdapa sa suspek nga natigayon pasado 1:00 sa kadlawon.

Ang patay’ng lawas sa suspek nagpabilin pa karon nga Mr.X sulod sa morgue sa SPMC sanglit wala pa’y kabanay o pamilya nagpatim-aw aron i-claim ang patay’ng lawas sa naasoy nga tulisan.

Facebook Comments