Davao City – Gawas sa mga isyu nga gikalambigitan sa lugar, posibleng mamahimong Tourism Developmental Zone ang Marilog District.
Kini maoy gipamahayag karon ni Davao City Councilor Al Ryan Alejandre atol sa Pulong-Pulong ni Pulong (PPP) karong adlawa.
Sumala sa committee chair on tourism and beautification, naklasipika na ang kayutaan sa Marilog district isip forest land, agricultural land ug ancestral land.
Subay niini atol usab sa pakighinabi kang Vice-Mayor Bernard Al-ag, gitataw niini nga aduna lamay duha ka mga barangay ang gideklara isip Toursim Developmental Zone nga mao ang Baganihan ug Salumay.
Saysay ni Al-ag, nagsugod na sa pag-inspeksyon ug pag-assess ang Composite Team nga gilangkuban sa Business Bureau, City Planning ug City Assessors sa nilabay’ng duha ka semana human ma-aprubahan ang resolusyon ni Councilor Alejandre, aron ma-identipika kung kinsa kadtong mga land owners o resorts owners nga nakalapas sa balaud.
“Once wala moy violation, no need to worry (kay) kung mosunod lang ta sa atong mga palisiya, sa zoning ordinance, sa Building Code wala tay ika-worry,” segun sa bise mayor.
Gipasabot niini nga ipailawom kini sa due process diin maghatag og tsansa nga mu-comply ang mga malapason apan hatagan og issuance of closure panahon sa ikatulong warning.
Dugang niini, ipagula ang resulta sa maong inspeksyon sulod sa tulo ka bulan.
RadyoMaN Jason Amisola
