Mayor Jalosjos, mihatag ug pasidungog ngadto sa CDRRMO, CHO, CNC

Si Mayor Seth Frederick P. Jalosjos inubanan sa mga miyembro sa Sangguniang Panlungsod, mihatag ug pasidungog sa tulo (3) ka opisina/division, kaniadtong Lunes, Enero 23 ning tuiga, dungan sa gipahigayon nga sinemanang programa sa flag raising ceremony sa kagamhanang lokal ning dakbayan sa Dapitan.
Subay kini sa probisyon sa Civil Service Commission, diin gipa implementar ang matag ahensya sa gobyerno sa pagpatuman sa Program On Awards and Incentives for Service Excellence (PRAISE). Busa, mapasigarbuhon si Mayor Jalosjos nga mitunol sa pasidungog ngadto na sa City Disaster Risk Reduction & Management Office (CDRRMO) ning syudad, pinangulohan ni Engr. Nelson Quimiguing, alang na sa award sa Seal of Excellence isip nakatuman sa tanang reglamento alang na sa gipahugayon nga 22nd National Gawad Kalasag sa Disaster Risk Reduction and Management and Humanitarian Assistance nga gipahigayun didto sa Zamboanga Del Sur.
Gipasidunggan usab ang City Health Office (CHO) sa pagpangulo ni Dr. Rolito Cataluรฑa, isip Top Performing Local Government Unit on COVID-19 Response (City Health Office Category), tungod sa paghatag ug dakong importansya ug mga pamaagi sa pagimplementar sa COVID-19 Response PDITR+V Strategy, ingon man usab sa malampusong pagpatuman sa routine immunization nga mikabat ug 80% ang nabakunahan nga mga kabataan sa tibook syudad taliwala sa gisagubang nga pamdemya gumikan sa COVID-19, ingon man nakaangkon usab ug dakong porsyento ang CHO tungod sa pagpahigayon ug booster shots kontra COVID-19 sa mga kabaranggayan.
Lain pang nakadawat ug pasidungog mao usab ang City Nutrition Council (CNC) ning dakbayan, isip awardee sa 2021 Green Banner Seal of Compliance Award, ug ingon man usab pasidungog alang kang Ms. Liezel Balagapo sa City Nutrition Division, nga namahimong usa sa mga finalists sa gipahigayon nga 2021 Regional Outstanding City Nutrition Program Coordinator.
Sa mensahe sa halangdong mayor, siya nagpasalamat ug dako sa mga awardees tungod sa paghatag ug dungog sa atong pinalanggang dakbayan. Dugang pa ni Mayor Jalosjos, isip empleyado magbuhat kita ug tarong sa atong trabaho, ug magpabilin nga matinud-anon ug ligdong dili lamang tungod kay nagpaabot kita ug ganti apan alang sa atong kaugalingon nga kita mulambo. (Liermie Eguia Photos by: Mark G. Potot | City Information Division)
Facebook Comments