Mayor Pablo Matinong sang Sto. Niño, South Cotabato gintiro, patay.

Patay si Mayor Pablo Matinong sang Sto. Niño, South Cotabato matapos luthangon sang riding in tandem criminal sa Purok Libertad, Barangay Poblacion, Sto Nino, South Cotabato bag-o mag- alas 8 subong nga aga, Hulyo 10, 2020.
Suno kay Sto. Nino Councilor Helen Fale nagaisahanon nga nagapatigayon sang inspeksyon sa proyekto sini sa nasambit nga lugar ang alkalde sang nagluntad ang pagpangluthang.
Nakamask suno pa ang mga suspek kag nakasakay sa motorsiklo nga wala sang plaka.
Nakaangkon sang igo sang bala sa ulo ang alkalde nga nangin tunaan sang iya hinali nga kamatayon.
Suno pa nga sa una nga pagluthang sa alkalde wala ini natumba, apang ginbalikan sang suspek si Mayor Matinong kag liwat nga gintiro.
Samtang isa naman ka babaye ang naigo sang bala sa abaga nga malapit sa nahamtangan sang opisyal.
Sa subong nagapadayon pa ang imbestigasyon sang kapolisan sa nasambit nga insidente.
Madumduman nga una na nga nalakip sa drug watchlist ni Presidente Rodrigo Duterte si Mayor Matinong , apang tigayon naman suno pa nga nalimpyo ang pangalan sang opisyal.

Facebook Comments