Davao City – Naghangyo ang kabanay sa nagpakamatay nga adunay gibating balatian nga sabton una sa media ang pagbangotan sa pamilya sa nag suicide tungod kay anaa pa sila karon sa kasubo tungod sa kalit nga panghitabo.
Sa tulumanong Kuskos Batikos, human ma-interbyu ang usa sa kabanay sa biktima, ilang gipahungaw ang gibating kasagmuyo sa usa ka media outlet human gibalita niini sa kahanginan nga gidulaan ang granada ug kini aksidenteng mibusikad rason sa hinanaling kamatayon ni Jerry Mahinay.
Gihimakak ang taho sa mga kabanay tungod kay ang kamatuoran depressed ang biktima gumikan kay aduna kini giantos nga balatian nga ‘lung cancer’.
Dili na kuno mudawat og pain reliever ang lawas sa biktima rason nga inig sugmat sa iyang sakit grabe gayud ang bation niining pag-antos.
Gumikan niini iyang gihap-an ang granada ug dayong nagpakamatay sulod sa ilang lawak sa pinuy-anan niini sa Dominacan Shrine Hills Matina, Davao City.
Nihangyo ang pamilya nga i-respeto una ang ilang pribasiya ug sabton ang ilang kahimtang nga labihang nagsubo sa nahitabo.
RadyoMaN Erin Lumosbog
