Posible masuspindir ang duha ka mga alkalde sa South Cotabato tungod sa pagbayolar sang prioritization sa COVID 19 vaccination kon basehan ang pahayag ni DILG Undersecretary Epimaco Densing, suno kay DILG provincial director Atty. Rochelle Mahinay Sero.
Apang magadepende naman suno sa iya sa eksplinasyon sang mga nasambit nga alkalde kag kon batunon sang central office ang ila nga depensa ukon rason.
Samtang suno kay Atty. Sero may pahayag si Presidente Rodrigo Duterte nga paimbestigaran sini sa Ombudsman ang wala pagsunod sang mga alkalde sa priority list sa bakunahan sang COVID vaccine.
Ginkumpirmar man ni Atty. Sero nga wala pa sila nakabaton sang kopya sang show cause orders halin sa DILG central office para kanday T’Boli Mayor Dibu Tuan kag Sto. Nino Mayor Sulpicio Villalobos.
Samtang base sa incident report sang mga Municipal Local Government Operations Officer (MLGOO) nga ginsubmitir suno kay Atty. Sero, ang rason sa pagpabakuna sang duha ka mga alkalde ang para mahangkat ang mga healthworkers nga magpabakuna kag mapasanyog ang vaccination program sa lugar.
