Mga kalampusan sa kapulisan sa Bukidnon, gipresenta atol sa press conference sa PNP-Headquarters

Gipangunahan ni PCol. Reynante R. Reyes, Provincial Director sa PNP-Bukidnon, ang pagpresenta sa mga nag-unang kalampusan sa kapulisan sa probinsya.

Kini atol sa gipahigayong press conference kaganiha didto sa Provincial Headquarters, Camp Ramon M. Onahon, Barangay 7, Malaybalay City, Bukidnon.

Muabot sa 27 ka mga top Most Wanted Persons sa probinsya ang nadakpan sa mga otoridad gikan Setyembre 28 hangtud Oktubre 24 ning tuiga sukad nga mihulip sa pwesto pagka-Director sa kapulisan sa probinsya sa Col. Reyes.

Sa maong ihap, 11 ang top most wanted persons sa nagkadaiyang kaso sa probinsya, tulo (3) ang city level, ug 13 ang municipal level.

Sa matang sa loose firearms, siyam ang naarestong mga suspetsado, 27 ka mga tag-as ug mugbo nga mga kalibre sa armas ang narekober, ug 22 ang nakompiska sa “Oplan Katok” nga programa sa kapulisan.

Sa pikas nga bahin, ubay-ubay nga mga gramo sa gituohang drogang shabu ang nakompiska sa mga otoridad atol sa gipahigayong mga drug buy-bust operations diin mutimbang og kinatibuk-ang 34.59 gramos ug gibana-bana nga mukantidad og kapin P200 mil ka pesos.

Gipaniguro ni Col. Reyes nga magpadayon ang mga operasyon sa kapulisan batok sa mga nagkadaiyang kriminalidad samtang gipasidunggan ang mga nag-unang presinto sa kapulisan sa probinsya sa mga kalampusan niini.

Facebook Comments