Mga kandidato sa BSKE 2023 gitagalan og tulo ka adlaw nga tanggalon ang ilang mga campaign materials nga wala sa designated area

Davao City – Gitagalan lang og hangtod tulo ka adlaw ang mga Kandidato sa Barangay ug Sangguniang Kabataan Election (BSKE 2023) aron tanggalon ang ilang mga posters nga gipaskin nga wala sa designated area.

Sa interbyo sa DXDC RMN DAVAO NEWS TEAM kang Buhangin Police Station Chief of Police Major Joenel Pederio, gikonpirma niini nga atol sa ilang gilusad nga Simultaneous Operation Baklas sa Composite Team nga gipangulohan sa Commission on Election Davao Region kagahapon adlawa, namatikdan nila ang paghitak sa mga campaign materials nga wala sa common posters area.

Suma ni Pederio nga wala dayon nila gibaklas ang mga posters kay ilang gihatagan og tulo ka adlaw ang mga Kandidato nga ilang pananggalon ang mga posters.

Ug kung magmagahi sa pagbuhat sa ingon ang mga Kandidato, dinha na ikasa sa Composite Team ang Operation Baklas nga langkuban sa Comelec, PNP, Cenro, ug uban pang buhatan, hinoon, way gitino kon duna ba’y silot ihampak batok sa mga Kandidato nga wala mituman sa regulasyon sa kampanya nga mahuman karong Uktobre 28,2023.

Una nang gibutyag ni Comelec XI Acting Regional Director Atty. Gay Enumerables nga mag-isyo kini og show cause order batok sa mga Kandidato nga nakasupak sa palisiya sa ilang buhatan.

RadyoMaN Joel Viray