Kalibo, Aklan — Natigayon nga madakpan ko mga kapulisan rong sangka notorious nga manakaw sa mga apartment iya sa banwa it Kalibo kahapon.
Ro suspect nakilaea nga si Glenn Alvin Orille, 43-anyos, kaibahan ro anang misis nga si Maria Evelyn Orille, 33-anyos ag mga residente it taga Block 16, Lot A1, Phase II Cañon, Lantic, Carmona, Cavite.
Nadakpan sanda ko kapulisan matapos nga maghana nga pumaeagyu kung sa siin dikara umagi sa mga crossing Buswang, lumiko pa J. Magno St. deri-deritso sa may Oyo Torong St. ag matakas kunta paadto it tulay ugaling uwa na masayuri nga uwa it eapsan rason nga natinguha i-atras ro anang saeakyan ag dumali-os os paubos ag dayon imaw nga naha korner it mga kapulisan.
Sa pagpangusisa ag sa ginpatigayon nga inventory it mga kapulisan sa sueod ko anang saeakyan na recover ro mga kaabo abong gamit nga tinakawan kamana kung mga alahas, relo, laptop, netbook, cellphone ag mga kwarta, sari-saring IDs nga ginapana-iyahan ko mga tinakawan.
Na-recover pa gid sa likod nga parte it anang saeakyan ro sangka fragmentation grenade nga eagi man gin secure ko mga taga bomb squad, may kutsilyo ag picha corno.
Bago pa man ro insidente, hay napan-uhan si Orille it sambilog sa anang mga naging biktima ag ana nga gin kompronta kung sa siin madasig rayang nagpaeagyu sakay it andang Granteur Foton Van kaibahan ro anang misis ag andang unga ag gin-eagas it mga meyembro kung Kalibo Auxiliary Police ag iba pang individual kaibahan eon sanday SB Juris Sucro ag ro anang driver nga si Mr. Rennel Nalangan.
Sa pagtinguha nga makapaeagyo, may ana pang hinapit nga sangka estudyante nga naga motor ag uwa man nana pag punduhi .
Rayang si Orille ag ro anang saeakyan hay naha bue-an it CCTV footage sa pila ka mga apartment nana nga ginsueod.
Eagi man nga nag-adto sa Kalibo PNP rong mga nabiktima ni Orille ag nag perma nga magapasaka it kaso kuntra kana.
Sa makaron hay kulong ro mag-asawa sa lock-up cell it Kalibo PNP ag ginapahaum eon ro kaso nga igapasaka kontra kanda, samtang ro andang unga nga 3 years old hay sa paghinakop it DSWD.
