Operasyon sa 2GO Travel, pormal nang nagsugod

22

General Santos City–Pormal nang nagsugod, adlaw nga Lunes, ang pagbalik sa operasyon sa 2GO Travel, ang pinakadako nga inter-island ferry company sa Pilipinas.

Nahimong guest speaker ang first lady sa Sarangani Province, si Ms. Michelle Lopez Solon, ang kapikas sa kinabuhi ni Governor Steve Chiongbian Solon, sa nahitabong inagurasyon og ribbon-cutting ceremony kagahapon sulod mismo sa MV St. Michael The Archangel sa Makar Wharf, Gensan, isip sya ang chairperson sa Region 12 Tourism Council. Kauban niini ang mga kadagkuan sa 2GO Travel og sila Gensan Vice Mayor Shirlyn Bañas-Nograles, Department of Tourism Regional Director Armin Hautea, og 1002nd Brigade Commander Brigadier General Roberto Ancan.

Human sa unom (6) ka tuig nga paghunong sa operasyon, subling nibalik sa Region 12 ang kumpanyang 2GO, dala ang hamugaway og nindot nga mga pasilidad sulod sa barko. Kaduha sa usa ka bulan mubyahe ang barko nga adunay ruta Manila-Davao via Iloilo, Zamboanga og General Santos City. Mu-akomodar kini og 1,929 ka mga pasahero.

Segun ni Maam Michelle Solon, dako kaayo kinig ikatabang sa ekonomiya dili ra sa Sarangani Province kundili sa entiro Rehiyon Dose tungod kay imbes muadto pa sa Davao og Cagayan de Oro ang mga pasahero og ang mga produkto, direkta na kining isakay sa Gensan Makar Wharf.

Gipaningkamutan sa local tourism council nga makatabang kini nga mahimo nga matag semana ang byahe aron daghan pa ang maserbisyuhan.

Facebook Comments