Davao City – Subling gipahibalo ni Committee on Social Services chair Councilor Wilberto Al-ag sa publiko nga wala pa naaprubahan ang ordinansa sa paghatag og pinansyal nga ayuda sa mga senior citizens.
Atol sa media briefing gitin-aw ni Al-ag nga nasabtan niini nga gikinahanglan gayod kaayo sa mga katiguwangan ang maong financial aid apan angay usa nga magpaabot.
Samtang, gibutyag usab ni Councilor Ralph Abella kinsa niduso sa maong ordinansa nga usa sa mga requirements aron maka-avail sa sa maong benepisyo ang mga senior citizens kinahanglang registered voter dinhi sa Davao.
Matud ni Abella kini aron sa pagsiguro nga ang budget sa syudad para lamang sa mga senior citizens nga taga-Davao.
Sa gidusong ordinansa matag 2nd Week sa Nobyembre itunol sa lokal nga panggamhanan ngadto sa matag Barangays ang gilaraw nga P3,000 financial assistance nga maggikan ang budget sa Real Property Tax sa lungsod.
Subay sa datos sa Office of The Senior Citizens kun OSCA adunay 114,490 ka mga rehistradong senior citizens dinhi sa dakbayan sa Davao.
Nanawagan usab si Abella ngadto sa Commission on Elections nga unta ipadala na ang mga IDs ug certificate of registration sa kada barangay para mahatag na kini sa mga seniors.
RadyoMaN Aimee Guinita
