Paggamit hin bis ano nga plastic, bawal na ha Pinabacdao, Samar

171

TACLOBAN CITY – Iginbabawal na an paggamit hin bisan ano nga plastic ha ngatanan nga okasyon han government offices ha Pinabacdao,Samar.

Ini in matapos nga magpagawas hin Executive Order hi Mayor Teodorico Mabag.

Ha interview han RMN kan Engr. Ernilo Gabumpa, Municipal Planning and Development Officer, ira gintakangan an aksyon matapos ma-obserbaran nira nga damo iton plastic nga basura ha mga okasyon han government offices ha ira bungto.

“Nakita namon nga kada activity damo-damoan it aton participants, mayada kita pa-snacks, lunch ngan mayada pa snack ha kulop, ha usa pala ito nga batch damo na nga plastic it aton generated, while dako naton nga problema iton collection ngan disposal hit aton garbages.”

Bawal na an paggamit hin disposable cups, plates, lunch boxes, utensils, pati na gihapon an plastic bottles, plastic packed ngan canned drinks ha mga government-sponsored activities, programs, lectures, trainings ngan seminars ha Pinabacdao, Samar.

Epektibo na ini nga Executive Order dida han lunes, January 7, 2019.

Naghuhuna-huna na gihapon an mga opisyal han mao nga bungto nga magpasar hin ordinansa bahin hini.

Ha kadugangan nga impormasyon, bawal na gihapon ha government ocassions ha ira bungto an pag-inom hin softdrinks.

“Iginbawal na gihapon namon an pag-serve hin carbonated drinks or softdrinks para gihapon ha maupay nga panlawas naton.”

Basi ha mga nakuha nga reports han RMN, an Pinabacdao, Samar an syahan nga munisipyo nga mag-iimplementar hin sugad hini nga order ha Region 8.

Hingyap naman nga may mga bungto nga sumubad ha aksyon han mga opsisyles ha Pinabacdao, Samar.

Facebook Comments