Pagtugot sa F2F classes sa Davao gipasalamatan sa Davaoeños

Davao City – Daghang Davaoeños ang nagpasalamat ug gikalipay ang pagtugot sa City Government of Davao sa private ug public schools sa pag-apply alang sa face-to-face (F2F) classes gikan Kindergarten hangtud sa Post-Graduate Studies.

Sa interbyu sa DXDC RMN Davao kang Febbie Matugina, 53 anyos, usa ka inahan nga taga Bolton Isla, Barangay 76-A, Bucana, Davao City, gibutyag niini nga mas maayo ang pagtugot sa F2F classes diin mas daghang makat-onan ang kabataan kung itandi sa module o blended learning.

“Mas nindot gyud kadtong ang face-to-face kay para dili na mahago ang mga ginikanan. Dili na mahago sa pagtudlo sa ilahang mga anak. Mas daghan ilahang makat-onan kaysa module,” matud ni Matugina.

Subay sa Executive Order (EO) No. 9 Series of 2022 nga gipagawas sa Local Government Unit (LGU) Davao kagahapong adlawa (Marso 2, 2022), no objection o dili na pugngan sa LGU ang F2F application sa mga eskwelahan, karon nga anaa na sa COVID-19 Alert Level 1 ang syudad ug taas na usab ang ihap sa mga nabakunahan batok COVID-19.

“Davao City is currently at 85.93% for first doses and 84.00% for second doses of 80% of the city’s total population, and at 16.34% for booster shots of the total number of fully-vaccinated individuals as reported by the Davao City Task Force on COVID-19 on February 28, 2022,” tipik sa EO.

Sa Section 2 sa EO, istriktong gihapong ipatuman ang Minimum Public Health Standards (MPHS) batok COVID-19 sa mga eskwelahan sama sa pagsuot og face mask ug social distancing, ug pagsunod sa guidelines gikan sa Department of Education (DepEd), Commission on Higher Education (CHED), ug uban pang government agencies.

RadyoMaN Kirby Manzon