Pamilya sang seaman nga nagpositibo sa COVID-19 sa Koronadal nagnegatibo sa PCR test.

23

Nagnegatibo sa coronavirus desease ukon COVID-19 ang tanan nga miyembro sang pamilya sang isa ka seaman dire sa syudad sang Koronadal nga nagpositibo sa nasambit nga balatian sang nagligad nga semana base naman sa resulta sang ila nga PCR test. Ini ang nangin kumpirmasyon ni OIC City Health Officer Dr. Editho Vego.
May-angot sini, sa subong suno kay Dr. Vego wala pa sang nagakaigo nga ebidensya agud nga maistablisar nga may local transmission na sang COVID-19 sa syudad.
Apang padayon nga ginaawhag ni Dr. Vego ang publiko nga indi sa gihapon magkumpyansa, kundi ipadayon ang istrikto nga pagpatuman sang mga health protocols kapareho sa pagsuksok sang facemask, handwashing, physical distancing, paglikaw sa matawo nga lugar kag iban pa tungod sa posibilidad sang local transmission sang nasambit nga balatian kon magpabaya.
Madumduman nga nadiskubrihan nga nagpositibo sa COVID-19 ang seaman matapos nga nagpaidalom ini sa swab test sa Davao City bilang isa sa requirement sa pagbalik niya sa trabaho.

Facebook Comments