Davao City- Dako ang papel sa mga ginikanan diha sa paggiya ug pagprotekta sa ilang mga anak aron dili kini makahimo ug mga dautan ngadto sa ilang mga isig-kaingon.
Kini sumala ni Psupt. Noel Asumen, hepe sa Samal PNP human sa nahitabong pagpanglugos sa 12 anyos nga batang lalaki sa iyang igagaw nga 6 anyos didto sa Barangay Limao, Samal District, IGACOS, Davao Del Norte.
Matud ni Asumen nga nagtinabangay karon ang WCPD, DSWD-XI ug mga opisyal sa barangay sa paghatag og mga interventions ngadto sa mga menor de edad.
Sa resulta usab sa medico legal positibo nga nalugos gayod biktima.
Ang biktima ug ang ginikanan niini gipailawom og psychosocial interventions human sa maong insidente.
Samtang gilaraw ni Asumen nga ibalhin sa Bahay Pag-Asa Village dinhi sa Davao City ang dose anyos nga suspek aron matutukan ang iyang rehabilitasyon.
Kahinumduman nga nagpatabang sa kapulisan ang inahan sa 6 anyos nga batang babaye human gi-rape sa ig-agaw niining 12 anyos.
Sa imbestigasyon sa SAMAL PNP, giagni sa suspek ang iyang igagaw nga magdula sa kabagnotan alas singko sa hapon una mahitabo ang insidente.
Panawagan ni Asumen sa tanang ginikanan nga bantayan ang ilang mga anak partikular na sa ilang makita sa telebisyon, social media ug internet.
Gipakusgan usab sa Samal PNP ang ilang paghatag ug edukasyon ug impormasyon sa mga estudyante ilabina sa mga hilit nga mga lugar.
RadyoMaN Aimee Guinita
