Friday, November 20, 2026

Tax deduction sa mga kompanyang mo-hire og PWDs ug senior citizens gisugyot

Davao City – Giduso ni Davao City Councilor Enzo Villafuerte ang paghatag og bawas sa buhis o tax deduction sa mga kompanya nga mo-hire og Persons with Disabilities (PWDs) ug senior citizens aron madugangan ang ilang oportunidad sa trabaho.
‎

‎Matud ni Villafuerte, gisugyot nila ang lima hangtod 10 porsyentong bawas sa buhis nga bayran sa mga kwalipikadong establisemento, diin gikinahanglan usab nga labing menos usa ka porsyento sa kinatibuk-ang empleyado sa kompanya ang PWDs kun senior citizens.
‎

‎Gilatid usab sa proposed ordinance nga kinahanglan molungtad og labing menos unom ka bulan ang ilang employment, ingon man abli kini sa tanang klase sa disability, basta kwalipikado ang aplikante sa posisyon base sa iyang abilidad ug kahanas.
‎

‎Gipatin-aw sab sa konsehal nga naghulat pa sila sa rekomendasyon sa City Treasurer bahin sa angay nga porsyento sa bawas sa buhis tungod sa posibleng epekto niini sa kita sa siyudad ilabi na nga kon 10 porsyento ang ipatuman, gibanabana nga mokabat sa P300 milyon hangtod P400 milyon ang posibleng pagkunhod sa kita sa siyudad.

RadyoMan Wil Duran
‎

Facebook Comments