Peddler nadakpan sa pagpayuhot sa illegal nga droga

Walay mahimo kon dili sa pagbasol ang usa ka peddler human nadakpan sa gipahigayong drug buy-bust entrapment operation sa mga operatibas sa Malaybalay City Police Station inabagan sa Philippine Drug Enforcement Agency (PDEA) pasado alas 2:10 sa hapon kagahapon didto sa Zone-1, Barangay 10, Malaybalay City, Bukidnon.

Giila ang suspek nga si Albert Behiga, 36 anyos, minyo, Peddler, ug residente sa Purok-7, Barangay Laguitas, Malaybalay City, Bukidnon.

Narekober gikan sa suspek ang usa ka pakete sa gituohang drogang shabu nga mutimbang og 0.07 gramos ug gibana-bana nga mukantidad og P476.00 samtang laing upat (4) ka mga pakete pa sa drogang shabu ang nakompiska nga mukabat sa P7,480.00 ug mutimbang og 1.1 gramos.

Nakompiska usab ang usa ka kolor brown nga coin purse, usa ka P500 bill nga buy-bust money, ug usa ka kolor maroon nga Suzuki Multicab nga adunay plakang numero KAJ-6411.

Gitingkagul na karon sa Malaybalay City Police Station ang suspetsado alang sa tokmang disposasyon samtang i-turnover sa PNP Provincial Forensic Unit, Malaybalay City ang mga nakompiskang ebidensya alang sa eksiminasyon.

Mag-atubang sa paglapas sa RA 9165 kon Comprehensive Dangerous Drugs Act of 2002 ang dinakpang suspetsado.