Kalibo, Aklan – Haum eon rong Kalibo PNP para sa andang preparasyon ag security measures nga igapatigayon sa Undas 2019.
Suno kay PLTCol. Richard Mepaña, hepe it Kalibo PNP nga magiging regular ro andang deployment it mga kapulisan pero ana kara nga iga re-enforce ro mga personnel complement sa mga terminal.
Igapatigayon man ron re-routing ag igasarado ro pila ka mga karsada partikular sa prente it mga sementeryo.
Sa November 1, ro Jaime Cardinal L. Sin Avenue halin sa crossing Calachuchi Road hay one way. Samtang rong sa pihak nga lane hay magiging sarado sa mga saeakyan.
Ro halin sa Crossing Banga paadto it Osmeña Avenue hay magiging one way man sa mga motorista.
Pagapahinugutan eamang rong one side parking para sa may mga saeakyan nga naga adto sa mga sementeryo para nga indi man makaperwesyo sa iba.
Nagpadumdom man si Mepaña sa mga maga-adto sa sementeryo nga hugot nga ginabawae rong pagdaea it mga mataeom nga bagay, pagdaea it baraha ag pagsugae, mga makahililong nga ilimnon ag mga sounds.
Ana suno kana nga pagapalibutong ro mga civilian personel para mag inspection ag masiguro nga matawhay rong selebrasyon.
Dugang pa gid nga ginpadumdom ni Mepaña sa mga pumueoyo nga likawan rong mag post sa social media it mga At This Moment ag mga On The Way To para malikawan nga maka tsansa ro mga manakaw ukon tinguhaon eon lang nga indi magpanaw tanan para ma secure do inyo nga mga panimaeay.
Magiging katuwang it mga kapulisan ro mga force multipliers.
