Davao City – Aron dili mawad-on og customer si Henry Sarcena, tag-iya og bakery ug sari-sari store, mangunay gayod kini sa pagsusi kun husto ba ang expiration date diha sa iyang mga baligya.
Alang kang Henry, mahinungdanon kaniya nga maampingan ang mga customers busa bisan og wala pa sa expiration date, i-pull out na niya sa mga tindahan ang iyang produkto sama sa pan.
Gani bisan sa basic ug prime commodities, ginaseguro gayod ni Henry nga wala pa sa expiration date kay lisod na kun makapalit ang mga customers sama sa de lata nga expired na ug basin mayabo pa ang iyang negosyo.
Sa dagku nga mga tindahan sama sa grocery, ang tanang baligya naa gayuy price tag sanglit giya kini sa mga customers kun tagpila ang presyo sa ilang paliton una pa man muadto sa counter aron mobayad.
Ubos sa balaud, ang tanang tindahan gimandaran nga magbutang og price tag sa mga baligya ug paghatag og warranty sa mga customers, apan sa obserbasyon sa negosyante dili tanan nagtuman niini.
Hinoon, aminado kini nga sa iyang mga baligya walay nakabutang nga price tag apan masabtan ra kini sa katarungan nga dili man sama sa dagku nga groserehan ang iyang establisemento.
Bisan tuod og usa ka negosyante si Sarcena, dako kining uyon nga magpatuman ang DTI og price control sa merkaduhan aron masanta ang mga negosyante nga mupahimulos sa panahon pinaagi sa pagpasaka sa presyo sa ilang mga baligya.
Pabor ang negosyante kun pabug-atan ang silot sa mga malapason apan nabalaka usab kini nga basin mahimo kining tinubdan sa kurapsyon sa pipila ka opisyal ug mga empleyado sa gobyerno sama sa DTI.
RadyoMaN Joel Viray
