TACLOBAN CITY – Nanutok hin pusil an usa nga pulis ngadto han iya igkasi pulis, ini an nahinabo ha Russia St. Brgy. 109-A V&G Subdivision dinhi ha Tacloban, alas 12:20 han udto kakulop.
Basi han report tikang ha Tacloban City Police Office, ginkilala an biktima nga hi SPO3. Francisco Cambil Dela Cruz III, may asawa, PNP member ngan residente ha Brgy. Pawing Palo, Leyte.
Ginkilala naman liwat an suspek nga hi PO3. Nel Aterrado Coral, 37 anyos, may asawa, PNP Member ngan residente gihapon ha Brgy. Pawing, Palo, Leyte.
Ha nagawas nga imbistigasyon han mga otoridad, sakay han iya single nga motor hi SPO3. Dela Cruz samtang ginbabaybay niya an kakalsadahan han Russia St. han V&G. Iya nakit-an an tulo nga lalaki sakay gihapon han single nga motor nga nagpapagiwang-wang ha kakalsadahan.
Gindaop ini ni SPO3. Dela Cruz ngan nagpakilala hiya nga pulis pero aroganti nga bumaton an usa nga lalaki nga hi PO3. Coral nga pulis gihap hiya. Nabaruan ni Dela Cruz nga nakainom hi Coral pero dumaop ini nga suspek kan Dela Cruz ngan bumunot hin 9MM nga pusil ngan igintutok ha liog ni SPO3. Dela cruz.
Maupay nala nga na-manage ni Dela Cruz an panhitabo kun diin nakatawag pa hiya hin back-up pero han pakahibaro han suspek in dayon ini nga dumalagan ngan sumakay han single nga motor tipakadto ha Phase 2B.
Nagpabulig hi Dela Cruz ha mga kapulisan han Marasbaras ngan didto nakit-an nira an suspek ha kakalsadahan han Marasbaras tipakadto na ha Pawing , Palo Leyte.
Dali-dali nga gin-aresto nira hi PO3. Coral. Narekober tikang ha suspek an 9MM nga pusil nga mayada sulod nga 14 nga bala.
Maatubang hin grave threat nga kaso an suspek.
Ha pagka-yana, paslak na ini ha Tacloban City PNP Lock-Up Cell.
