Kalibo, Aklan – Posible nga kinahangeanon eon it mga turista nga makaangkon it tap cards o access bracelets bilang security measure sa isla it Boracay.
Raya rong gin anunsyo it Department of Environment and Natural Resources (DENR) bilang tikang para ma-regulate rong numero it mga nagasueod sa isla kadungan it re-opening kara sa masunod nga buean.
Suno kay DENR Secretary Roy Cimatu – ginasaligan nga maaprubahan rong security measure bago rong pagbukas it isla sa Oktubre 26, 2018.
Rong tap card suno kana hay magiging available sa Caticlan Jetty Port sa haygang ₱25 hasta ₱30 bilang deposit sa pagsueod sa isla.
Raya man hay magaserbeng alternative payment scheme para pambakae it produkto o serbisyo sa Boracay.
Sa makaron, may 6,405 tourist rong inisyal nga pagapahinugutang makasueod sa Boracay kada adlaw.
