Rescue Vehicle sa LGU-Midsalip nga kargado sa tag-as nga matang sa armas ug armadong kalalakin-an, naharang sa checkpoint

41
SND, Lanao del Norte – Nasita sa otoridad ang usa ka rescue vehicle nga gikargahan sa tag-as nga matang sa armas ug daghanang klase sa bala dihang naharang sa Border Control Checkpoint sa National Highway sa Brgy Tagulo sakop sa lungsod sa Sultan Naga Demaporo sa probinsya sa Lanao del Norte.
Wala makalahos sa ilang padul-ngan ang mga sakay sa rescue vehicle human mabuking nga kargado diay sa armadong kalalakin-an nga kadaghanan mga miyembro ug opesyal sa Moro Islamic Liberation Front-Bangsamoro Islamic Armed Forces (MILF-BIAF).
Naila ang mga dinakpan nga sila si Esmail Maruhom Wali, 42-anyos, Adam Mambuay Tando, 58 -anyos, Fausto Calimpas Guinita, 40 -anyos ug Sangbaan Obinay Acut, 58-anyos, pulos taga-Brgy Koreo, SND, Lanao del Norte.
Lakip usab nga gikustodiya sa kapulisan ang driver sa maong rescue vehicle nga empleyado sa LGU-Midsalip nga si Tristan Bendecion Baguio, 34 -anyos ug ang kauban nga nailang si Resil Bacsan Revillas, parehong lumulupyo sa lungsod sa Midsalip, Zamboanga del Sur.
Sa eksklusibo nga interview sa DXPR Pagadian ug 96.7 iFM kang PMAJ Moamar Solog, hepe sa SND Municipal Police Station usa ka joint COMELEC Checkpoint ang ilang gikasa uban ang tropa sa 2nd Provincial Mobile Force Company sa Lanao del Norte Police Provincial Office, pwersa sa 1005th Company sa Regional Mobile Force Battalion Region 10, elemento sa 2005th Mech Battalion ug Explosive Ordnance Division diin ilang giharang ang toyota hilux nga nagtangag sa plate number S4 SO61 nga gituohang iya Local Government sa Midsalip.
Nahipos gikan sa sulod sa sakyanan ug posisyon sa mga dinakpan lima ka high-powered firearms, lima ka short firearms, daghanang matang sa mga bala ug uban pang hinagiban.
Gikuha usab ang datos ug identipikasyon sa kapin 30 ka indibidwal nga sakay sa dumptruck nga nagconvoy sa naharang nga rescue vehicle.
Ang mga dinakpan ang dinakpan gikatakdang pasakaan sa kasong paglapas sa akta republika RA 10591 kon Comprehensive Firearms and Ammunition Regulation, Republic Act 9516 ug pagsupak sa Comelec gun ban.
Gisulayan unta sa RMN-DXPR ug iFM News Team nga makuha ang habig sa mga dinakpan apan nagdumili kini pag-atubang.



Facebook Comments