Davao City – Kawang lamang ang katuyoan sa balaud nga ‘Rice-For-Waste’ nga giduso karon sa House of Representatives kung dili masabtan sa tawo ang diwa or importansya sa waste management.
Maanindot ang tumong sa ‘Rice-For-Waste’ campaign kay pagtabang man kini sa mga naglisud apan anugon ra gihapon ang tanan kung wa’y igong kahibalo sa waste management ang tawo, sumala sa Kinaiyahan Foundation.
Matud sa Focal Person nga si Betty Cabasares, ang paghatag og incentives kun reward sa makatigom og hazardous ug recyclable plastic wastes dili malungtaron nga solusyon inay temporaryo lang nga sulbad sa suliran sa basura.
Gitataw ni Cabasares nga ang gikinahanglan karon sa mga Pilipino dili ang reward inay ang igong kasayuran ug edukasyon sa waste management.
Hangtud dili muabot sa level sa hunahuna sa tawo ang saktong paglabay sa basura, padayon gihapon madaut ang kinaiyahan, busa dili gihapon magsilbi ang ‘Rice-For-Waste’ bill nga giduso sa Kongreso.
Gipananglitan ni Cabasares ang usa ka grupo kinsa mihatag og kahigayonan sa mga tawo nga makasapi pinaagi sa liso apan ang problema lakip ang mga kahoy nga adunay liso gipamutol aron mabayran og daku-daku.
RadyoMaN Joel Viray
