Davao City – Gidid-an una ang publiko nga mag-trekking ug camping activities sa Mt. Apo Natural Park sugod Hunyo 1 hangtod Agosto 31 isip kabahin sa tinuig nga “off-season” nga gipatuman sa Department of Environment and Natural Resources (DENR) ug sa Protected Area Management Board (PAMB).
Sumala sa DENR, nga tumong sa tulo ka bulan nga pagsirado ang rehabilitasyon sa kinaiyahan, pagpugong sa mga peligro nga mahimong mahitabo sa kabukiran, ug pagpanalipod sa mga tanom ug mananap nga nagpuyo sa Mt. Apo. Lakip sa apektado ang tanang open trails gikan sa Davao Region ug Soccsksargen.
Gilauman nga mobalik ang trekking activities sa Setyembre 1 human nga mahatagan og panahon ang pinaka taas nga bukid sa nasud nga makapahulay ug mapasig-uli ang natural nga kahimtang niini.
Kahibaluan ang Mt. Apo Natural Park adunay kapin 64,000 ka ektarya nga gilapdon ug padayon nga giandam alang sa umaabot nga UNESCO Global Geopark validation sa Agosto 2026.
RadyoMaN Kareen Beltran
Facebook Comments
