Sarangani Province–Gikumpirma ni PDEA 12 Regional Director Naravy Duquiatan nga wala silay gilusad nga anti-drug operation sa probinsya sa Sarangani sulod na sa tulo (3) ka bulan. Timaan nga gamay na lang matud pa ang nalambigit sa ilegal nga druga. Wala kini nagpasabot nga wala nay ginadiling druga apan dako matud pa ang gikunhod sa nagagamitan ug nagpayuhot og ilegal nga druga sa Sarangani Province.
Kini ang gibutyag ni Duquiatan atol sa nahitabo niaging adlaw nga Byernes, Septembre 27, nga regular quarterly meeting sa PADAC kon Provincial Anti-Drug Abuse Council sa Sarangani, kauban si Agent Jerome Valentos, ang PDEA provincial officer. Nausab matud pa ang lokasyon sa pagbaligyaanay og druga ug halos wala na kini nahitabo sa Sarangani. Apan bisan pa man niana, padayon ang ilang pagsuta sa mga personalidad nga wala gihapon nihunong sa ilang mga aktibidad.
Sa maong PADAC Meeting, personal usab nga gitunol ni PDEA Regional Director Duquiatan ang duha (2) ka pasidungog alang sa probinsya sa Sarangani nga gikan pa mismo ni PDEA Director General Aaron Aquino. Nahitabo ang national awarding atol matud pa sa ika-dise syete (17) katuig nga anibersaryo sa PDEA natigayon didto sa kauluhang Maynila.
Segun ni Duquiatan, unang higayon matud pa kini nga nahitabo sa Sarangani nga nihatag og pasidungog ang PDEA sa LGU. Unang pasidungog mao ang pag-ila sa PDEA ngadto sa PADAC Sarangani sa pagsuporta sa kamugnaan sa Seaport Inter-agency Task Group. Ginahan-ay na lang matud pa nila ang pipila ka mga rekositos, ug sa sunod nga mga inadlaw may mga myembro na sa PDEA kuyog ang mga K-9 nga mga iro nga mu-inspeksyon sa mga pantalan sa Sarangani Bay masiguro nga walay mahitabo nga drug smuggling gamit ang kadagatan, katugbang ang PNP, AFP, Coast Guard, Ports Authority, Maritime ug uban pang ahensya sa gobyerno.
Ikaduhang pasidungog mao ang pag-ila sa PDEA kang Governor Solon kauban si Malungon Mayor Tessa Constantino sa pagpatindog sa Balay Silangan Reformation Center, ang labing una nga community-based reformatory center sa PDEA sa tibuok Pilipinas nga anaa nahimutang sa lungsod sa Malungon, alang sa kadtong dili pa tantong nagumon sa druga apan buot nang magpa-rehab.
Present sa pagdawat ni Governor Solon sa maong mga pasidungog sila Vice Governor Elmer De Peralta, Malapatan Mayor Salway Sumbo, Malungon Vice Mayor Jun Escalada, Maitum Vice Mayor Tito Balazon ug mga municipal administrator, sa pagsuporta sa mga board member ug nila Senador Manny ug Congressman Ruel Pacquiao.
Una ng nakadayig si PCOO kon Presidential Communications Operations Office Assistant Secretary Ramon Cualoping III sa pagdumala ni Governor Solon tungod wala matud pa mukuyanap ang ilegal nga druga sa Sarangani Province. Si PCOO Asec Cualoping ang nagdumala sa programa ni Pangulong Rodrigo Duterte gitawag nga āRehabinasyonā aron tabangan ang buot nang magbag-o sa ilang kinabuhi human naalaot sa ginadiling druga.
