Single motor, mibangga sa SUV, drayber patay

36
Dead-on-arrival sa balay-tambalanan ang drayber sa usa ka single motor human nga mibangga ngadto sa usa ka SUV pasado alas 8 kagabie didto sa Sayre Highway, Purok-2B, Barangay Aglayan, Malaybalay City, Bukidnon.

Giila ang drayber nga si Elven Sayag, 35 anyos, minyo, ug residente sa Purok-4, Barangay 9, Malaybalay City, Bukidnon nga nagmaneho sa usa ka Yamaha Mio125 nga single motor, ug nagtangag og plakang numero 334 KQK.

Samtang ang nabanggaan niining Toyota Innova Wagon, nga nagtangag og plakang numero KDZ 396 gimaneho ni Virg Iman Eduave, 29 anyos, minyo, ug residente sa Purok-4, Poblacion, Valencia City, Bukidnon.

Sumala sa report sa kapulisan, nga pulos gadagan sa susamang direksyon pa-norte ang single motor ug SUV, sa dihang pag-abot sa lugar kung asa nahitabo ang disgrasya, paliko matud pa kining SUV ngadto sa pikas nga dalan apan wala kini mabantayi sa gasunod nga motorsiklo hinungdan sa pagkabangga sa motor ngadto sa tunga nga bahin sa maong SUV.

Gumikan sa kakusog sa impak, nakaangkon og grabeng injury sa ulo ang biktima nga gisuwayan pa og dala sa hospital apan gideklara ng dead-on-arrival sa doctor.

Temporaryo usab nga nakadetenar sa Malaybalay City Police Station ang drayber sa maong SUV alang sa tokmang disposasyon samtang giturn-over na sa punerarya ang patayng lawas sa biktima.



Panghimangnu karon sa Malaybalay City Traffic Management Center (TMC) ngadto sa mga motorista nga magmabinantayon sa kadalanan aron nga malikayan ang disgrasya.

Facebook Comments