TACLOBAN CITY – Gin-aaligar aksidente nga napusil an usa nga staff han drug store han ira security guard ha Baybay City, Leyte, dida han myerkules February 13, 2019.
Subay han report han Philippine National Police (PNP) ha Baybay, napusil an biktima nga hi Eizen John Narbonita, 21 anyos, usa nga self service assistant han Mercury Drug Store, residente ha Carigara, Leyte.
Ginkilala naman an nakapusil nga suspek nga hi John Degrano Martin, 23 anyos, security guard, residente ha Brgy. Hilaknitan, Baybay City.
Ha imbistigasyon, nagtanggal hin .38 caliber nga pusil an security guard pero sumangko daw an holster hini ha lingkuran rason han kaaksidente nga napusil an biktima.
Ha dughan naigo an biktima, nadara pa ini ha hospital pero gindeklara ini nga patay na.
Ginrereview naman an CCTV han mao nga drug store para makit-an an mga panhitabo.
Boluntaryo naman nga sumurender an suspek.
Naghuhulat naman an kapulisan ha pamilya kun magpapasaka hira hin kaso.
