Davao City – Unsa kaha ang naghulat kanato ning tuig 2018? Unsa kaha ang kalahian niini sa nilabay’ng 2017? Maka-eksperyensya kaha kita sa mas mauswagong kinabuhi? Makatikang na gayud kaha ang atong nasud sa mas improbadong sitwasyon ug mas malaboong ekonomiya alang sa tanan?
Ning tuiga, lauman nato nga magpadayon sa gihapon ang mga hagit sa atong kinabuhi, sa atong panarbaho, sa panginabuhi, sa pamilya ug sa komunidad.
Kun unsa man ugaling ang atong paningkamot niadtong niligad nga tuig, mas dut-an pa gayud nato karon ilabi na sa nagkaanam kalisud nga kalibutan karon.
Sa mga programa sa kalamboan dinha sa atong mga komunidad, padayon nato kini silang ubanan, suportahan ug tabangan sanglit kita man gihapong katawhan ang mamahimong ‘ultimate beneficiaries’ niining tanan.
Oo, malagmit nga anaa gihapon atong masinatian ang mga katalagman, mga gubat kun konflikto hatud sa managkalahing ideolohiya or barug-pulitika, pagsaka-kanaug sa ekonomiya, sa mga hulga sa atong kasanihan ug maayong panglawas, sa seguridad sa atong mga banay gumikan sa mga lawless elements, panerorismo ug uban pa.
Apan dili kita mo-surrender: Kun unsa kita nga nagkahiusa ug maisogong gikonpronta ang mga hagit sa atong katakos kaniadto, buhaton gihapon nato karong tuiga.
Gamiton nato ang kusog sa panaghiusa natong tanan, ibandera nato ang bansilag nga ‘Walang Maiiwan’ ug nga uban ‘tang tanan sa bisan unsang mga pagsulay.
Labaw sa nga tanan, isandig nato ang tanan natong mga paningkamot, kusog ug determinasyon diha sa pundayon sa Kahitas-an. Magpalandong gihapon kita ilawom sa sanktwaryo sa Ginoo sanglit kon anaa kita ubos Kaniya ug sa iyang mga gamhanang pako, walay bagyo, walay katalagman, walay paghagit nga dili natong maharong ug mapukan.
RadyoMaN June Duterte
