TACLOBAN CITY – Sunod-sunod nga panhitabo hin panhold-up ngan panmuno ha syudad han Tacloban nga nagdadabi ha tulo nga suspek.
Nagviral pa ini ha social media matapos i-post han mga biktima an sitwasyon han agawon han mga suspek an ira mga higamit.
Sumala ha post ni Kate Morante, naghuhulat hiya hin san jose nga jeep ha Real St alas 7:00 han gab-i. Han may dumaop nga tulo nga lalaki ngan ginhablot an iya bag nga may sulod nga cellphone ngan kwarta.
Sumunod naman an post ni Nicole Nicol nga ginbuno an iya bugto han tulo gihapon nga lalaki ha Gomez St. An iya pagud bugto in usa nga special child.
Ha post naman ni Sharabell Calvadores, an iya sangkay in ginbiktima han tulo nga lalaki alas 8:00 han gab-i ha may RTR plaza kun diin ginkakakuruha an cellphone han iya sangkay.
Sumala han Tacloban City Police Office, nagdudumara na hira hin imbistigasyon ngan hot pursuit operations para magkadadakop ini nga mga suspek.
Mas gin dugngan gihapon an pagdeploy ngan pagbantay han mga kapulisan ha syudad.
Gin-baisuhan naman han Tacloban PNP an publiko nga dayon nga makipagsumpayan ha ira kun mayada mga sitwasyon nga diri maupay sugad hin krimen ngan emergency, pwede tumawag dayon ha numero nga 0917-631-7752 ngan 0998-991-3699.
