Davao City – Gipaniguro sa pamunoan sa Davao City Overland Transport Terminal (DCOTT) nga dili gayud makalusot kun makasulod sa terminal ang mga terorista ug dautang mga tawo aron magsabwag og kaguliyang.
Segun ni DCOTT Head Aiza Yusop, muagi ang tanan sa usa ka lane diin gi-montar ang walk-through x-ray machine sa entrance point una pa hingpit makasulod sa terminal.
Sumala ni Yusop nga gawas sa gitaud nga modernong kagamitan, nagkatag usab sulod ug gawas sa terminal ang mga sakop sa Task Force Davao ug mga sakop sa Davao City Police Office (DCPO) inubanan sa mga K-9 operating units.
Gi-asoy usab ni Yusop nga ang ilang gihimong adjustments sa security measures sa premises sa terminal kabahin sa mas gipahugtang seguridad batok terorismo ug uban pang mga hulga sa atong katawhan.
Kini nga aksyon bunga sa nahiotabong pagpamomba sa Isulan Sultan Kudarat nga gikaangol sa walo ka mga tawo ug ang suicide bombing gawas sa kampo sa militar sa Indanan, Sulu sa miaging semana.
Gani, pabor ang opisyal sa sugyot sa TFD nga kapkapan ang mga babayeng Muslim kinsa nagasuot og ‘hijab’ kun veil sa kondisyon nga babaye usab nga pulis or sundalo ang mu-inspection ngadto kanila.
Gipasabot sa DCOTT Manager, kinsa usa ka Maranao nga konserbatibo ang mga babayeng Muslim hinungdan sa maong matang sa pamiste nila.
Giuyonan ni Yusop ang suhestiyon ni First District Councilor Ma. Belen Sunga-Acosta sa paghimo og lawak kun ‘curtain-type cubicles’ diin ipahigayon ang security inspection.
RadyoMaN Joel Viray
