Davao City – Gikahimoot sa Trade Union Congress of the Philippines (TUCP) ang bag-ong balaod nga maghatag og baynte porsento nga diskwento sa mga estudyante nga musakay og mga depasaheroan.
Matud ni TUCP Spokesperson Allan Tanjusay nga dako nang tabang ang 20% discount alang sa pamilya nga ang sweldo gipaigo sa tibuok buwan apil na ang plete sa ilang sa mga estudyanteng anak.
Giingon ni Tanjusay nga bisan tuod og gamay ra ang baynte porsento nga diskwento sa plete apan dako na kining ayuda aron makadaginot ang mga ginikanan sa gasto ug dugang tigom na usab kini.
Batbat pa ni Tanjusay, ang 20% discount sa plete kahigayonan na usab kini sa mga estudyante aron makabiyahe ug makadiskubre og mga lugar sa nasud nga makatabang sa ilang personal development.
Segun ni Tanjusay, dili makatandog sa mga drivers ug mga operators sa mass transport ang diskwento inay makatabang hinoon kini sa ekonomiya diin ang makabenepisyo niini mao ra pod ang mga tsuper.
Dugang sa tigpamaba, dili na angay i-apil sa pagahimoon nga Implementing Rules and Regulation kun IRR ang pagsilot sa mga drivers ug mga operators nga dili mutuman sa bag-ong balaod sa nasud.
RadyoMaN Joel Viray
