General Santos City – patay ang usa ka 2 anyos samtang naospital ang amahan niini ug igsuon human nga mikaon ug kinilaw nga laman loob sa baboy nga giluto matud pa sa iyang apuhan alang sa panihapon niadtong adlawng Byernes, August 25, 2017.
Ang biktimang nakabsan nailang si Elian Ofalia, 2 anyos, samtang naospital usab ang igsuon niining si Eliana, 8 anyos ug amahan nga si Charlie Ofalia, 26 anyos pulos residenti sa Sunrise Subdivision, Barangay Lagao Gensan.
Subay sa pahayag sa apuhan sa biktima nga si Alma Minyoto, ilang napalit ang laman loob sa baboy sa usa ka meat shop sa Barangay Lagao niadtong Byernes sa hapon.
Katunga niini iyang gisugba dayon gikilaw ug gisud-an sa panihapon, apan pila ka oras ang nakalabay, nakasinati na ug sakit sa tyan ug pagsuka-suka ang tulo. Daling gidala ang mga biktima sa ospital ning syudad apan Sabado sa Gabie, Agusto 26, nakabsan sa iyang kinabuhi ang dos anyos.
Dugang pagbutyag sa apuhan nga tanang mikaon sa kilawin nga iyang giluto nakasinati gyud ug sakit sa tyan mao nga walay laing gidudahan ang pamilya nga hinungdan niini kon dili ang napalit nga laman loob sa baboy.
Lisod man dawaton apan walay mahimo ang pamilya apan nagsilbing leksyon ngadto kanila ang insidenti.
Sa kasamtangan ang patayng lawas sa dos anyos nga bata ang gihaya na sa ilang panimalay sa Barangay Lagao, samtang luwas na usab sa kuyaw nga kahimtang ang amahan niini ug ang 8 anyos nga igsuon.
