Urban flooding sa Davao dakung posibilidad

28

Davao City – Problema sa mga residente sa Buhangin Spring Valley ang ineffective drainage system tungod masapupo nila ang paghan-ok sa tubig gikan sa kasikbit nga mga subdivision mao nga taga-hawak ang baha.

Sumala sa usa ka residente nga si Henry Sarcena ila na gipaabot kang barangay captain Jimmy Salvador ang ilang suliran apan hangtod karon walay nahitabo sa ilang mulo.

Ug kung magsugod na gani og tapok ang dag-om mubati na og kabalaka ang mga residente sa Spring Valley gumikan kay sigurado mabahaan na pod sila lampas sa hawak.

Nasayod si Henry nga dili gayod sila kalikay sa baha hilabi pa nga walay sakto nga drainage system ang mga canal sa ilang lugar ugali magbundak ang uwan nunot aning bagyong Basyang.

Nagbayanihan karon ang mga residente sa Spring Valley sa pagpahimo og drainage aron masulbad ang ilang problema sa baha sanglit walay master plan ang barangay sa ilang suliran.

Nanawagan si kasamang Henry sa kagamhanang lokal nga susihon ang ilang kahimtang kung mag-uwan aron ilang makakita ang kalisod sa ilang sitwasyon kung magbaha nga walay drainage system.

Matud sa usa ka freelance contractor nga si Arnold Labunog nga kun dili magpakabana ang gobyernong lokal sa paghikutar sa master plan sa drainage system hayan muabot ang panahon masusama sa Metro Manila ang Davao City nga maglubog sa baha.

RadyoMaN Joel Viray

Facebook Comments