Usa ka lalaki nadakpan human makuhaan og kapin usa ka gatos ka libo pesos nga drogang shabu

Way mahimo kon di sa pagbasol ang usa ka lalaki human nga nadakpan sa gipahigayong drug buy-bust operation sa mga kapulisan ug nakuhaan og kapin usa ka libo ka pesos nga kantidad sa gituohang drogang shabu pasado alas 2:00 sa kadlawon kagahapon didto sa Purok-1, Barangay Alae, Manolo Fortich, Bukidnon.

Giila ang lalaking suspek nga si Joristy Casiño, 49 anyos, ulitawo, ug residente sa naasoy nga lugar.

Narekober isip buy-bust item gikan sa suspek ang usa ka pakete sa gituohang drogang shabu nga mutimbang og 0.07 gramos ug mukantidad og P476.00.

Samtang nakompiska ang 10 ka mga gagmay ug dagkong pakete sa shabu nga kinatibuk-ang mutimbang og 18.4 gramos ug mukantidad og P125,120.00.

Lakip usab nga narekober ang buy-bust money nga P1000 bill, laing kwarta nga mubalor og P18,450.00, usa ka gituohang kalibre .22 nga pistola, mga bala, ug mga drug paraphernalia.

Gidala na sa Manolo Fortich Municipal Police Station ang suspek lakip ang mga nakompiskang ebidensya ug target nga iturn-over sa Regional Crime Laboratory 10 sa Cagayan De Oro City alang sa eksiminasyon.

Mag-atubang sa paglapas sa RA 9165 kon Comprehensive Dangerous Drugs Act of 2002 ug RA 10591 kon Comprehensive Used of Firearms and Ammunition Regulation Act ang dinakpang suspek.