Cauayan City — Makasaysayan ang pagkakasungkit ng CAVRAA ng kauna-unahang gintong medalya sa girls elementary volleyball sa Palarong Pambansa 2026.
Mainit ang naging laban ng koponan kontra DAVRAA (Davao Region) sa finals game, at naitala ang iskor na 25-18, 25-19.
Ito ang kauna-unahang pagkakataon na nakamit ng Region 02 (CAVRAA) ang kampeonato sa nasabing kategorya, na nagmarka ng isang makasaysayang breakthrough para sa rehiyon matapos ang ilang taong pagsusumikap at malapit na pagtatapos bilang runner-up noong nakaraang edisyon.
Pinangunahan ng magkapatid na sina Nicole Rodriguez at Nathalie Rodriguez ang dominasyon ng Green Hawks, kung saan naghatid si Nicole ng 19 puntos at huling apat na puntos sa second set upang tuluyang selyuhan ang panalo. Nag-ambag din si Nathalie ng mahalagang 10 puntos na nagbigay ng dagdag na lakas sa opensa ng koponan.
Sa kabuuan, ipinakita ng mga atleta ng rehiyon ang lakas sa serving game at net attacks na nagbigay sa kanila ng kalamangan sa kabuuan ng laban at nagbukas ng bagong kabanata sa kasaysayan ng kanilang rehiyon sa volleyball.
Itinuturing na makasaysayang tagumpay para sa Region 02 ang pagkapanalo, at ngayon ay opisyal nang nakatala ang rehiyon bilang kampeon sa Girls Elementary Volleyball sa Palarong Pambansa.
