3 ka suspek sa pagpangdagit ilang kabanay sa Cateel, Davao Oriental arestado

265
Davao City – Sikop sa Cateel Municipal Police Station (MPS) kagahapong adlawa (Enero 25, 2022) ang tulo (3) ka mga suspek sa pagdagit sa 3 ka mga biktima sa bukid sa Barangay Malibago, Cateel, Davao Oriental alas 4:00 sa hapon niadtong Biyernes (Enero 21, 2022).

Sa interbyu sa DXDC RMN Davao kang Police Major Randy Galicia, Chief of Police (COP) sa Cateel MPS, giila niini ang mag-amahang suspek nga sila Joel Magquidong ug Veloso Magquidong, ug usa pa ka alyas “Jaguar”.

Ang nahisgutan maoy suspek sa pagdagit sa mga biktimang sila Rosalie Salvaña Sayman ug lain pang duha nga kabanay ra usab niini.

Nasayrang gibuhian ang lalaking biktima alang sa ransom money nga P300,000 bugti sa kagawasan sa nahibiling duha ka biktima. Apan sa dihang nakaikyas usab ang biktimang menor de edad (17-anyos), dinhi na brutal nga gigulgol ang li-og sa nahibiling biktima nga si Rosalie resulta sa kamatayon niini.

Gilayong gipahigayon ang pursuit operation batok sa mga suspek ug gi-alarma ang komunidad hinungdan nga nasikop ang nahisgutan sa Barangay Taytayan, Cateel.

“After atong naka-eskapo ‘tong iyahang pamangkin, didto gilaslas nalang gyud nila’ng liog (ni Rosalie). Then, dagan sila sa upper barangay sa Cateel. Mao ‘ni amoang gi-conduct nga pila ka adlaw nga pursuit operation and fortunately nakuha gyud namo (ang mga suspek),” butyag ni Garcia



Matud sa police official, extortion o pagpangwarta ang motibo sa krimen, diin ang mga dinakpan mag-atubang sa mga kasong murder, robbery, extortion ug physical injuries.

Nasayrang si Joel Magquidong, usa sa mga suspek nagbaton kini og kasong frustrated murder niadtong 2019, nakapyansa apan nag-jump bail o pakyas nga ni-report sa korte.


RadyoMaN Kirby Manzon

Facebook Comments