Sa interbyu sa DXDC RMN Davao kang Police Staff Sergeant Dan Rey Callo, investigator sa Calinan Police Station, giila niini ang biktima nga si Mario Carreon, 53-anyos, taga-Barangay Dalagdag ug kasamtangang nagpuyo karon sa Brgy. Dacudao, Calinan ning syudad.
Gisaysay ni Callo, subay sa mga saksi sa insidente, nagsakay sa motor ang biktima sa dihang giduol kini sa wala mailhing lalaki nga anaa sa 25-30 anyos ug kalit gitigbas ang biktima gamit ang lagaraw. Human sa insidente, gilayong misibat ang suspek gamit ang iyang motor padulong sa Brgy. Dacudao.
“As per witnesses, pag-abot sa biktima nga nagsakay sa motor, naay lalaki nisunod sa iyaha, nagdala og lagaraw. Ang suspek nato mura’g nag-atang na daan didto. Kalit lang gitigbas kaduha (ang biktima). Naigo ang ulo ug kamot,” saysay ni Callo.
Samtang, nangayo usab og hustisya ang anak sa biktima nga si John Carreon pinaagi sa social media aron manubag ang responsable sa krimen diin gibutyag niini nga walay nakabangi ang iyang amahan.
“Wala moy kalouy sa akong Papa. Wala mn unta syay sala ninyo. Kung kinsa man ang nagtigbas sa akong papa, hustisya lang ang amoa,” Facebook post ni John.
Sa pagkakaron, nagpadayon ang inbestigasyon sa kapulisan aron masikop ang suspek ug masuta ang motibo niini.
RadyoMaN Kirby Manzon
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
