Gintatambal yana ha hospital an unom nga elementary pupils han Capoocan Central School, Capoocan, Leyte han mabuthan hira han galonan hin ethyl alchol hadin nakalabay nga adlaw.
Ha imbestigasyon han kapulisan, an unom nga Grade 6 students in didto ha sulod han ira classroom, pero waray didto an ira maestra.
Nakakita hira hin galonan nga may sulod nga ethyl alcohol ngan nakahunahuna hira nga igbalhin ngadto hin iba nga surudlan.
Samtang nagpapalis han alcohol, an usa ha ira in kumuha hin lighter ngan ginpalaga ini.
Tigda la nga bumuto an galonan nga puno hin alcohol nga nagdurot hin mga kasamdan ngadto han mga biktima nga nag-eedad tikang 11 ngadto ha 13 anyos.
Hira in gindara ha Carigara District Hospital basi pagtambalon.
Facebook Comments
