7-anyos nga batang lalaki, napalgang patay sa sapa sa Sto. Tomas

Davao del Norte – Patay na dihang napalgan ang usa ka 7-anyos nga batang lalaki human giingong nalumos sa sapa sa Purok 4 Northgate, FD Road 1, Barangay Tibal-og, Santo Tomas, Davao del Norte, adlaw’ng Sabado, Oktubre 3, 2026.

Sa report nga nadawatan sa DXDC RMN Davao gikan sa Sto. Tomas Municipal Police Station giila ang biktima nga si alyas “Jan-jan”, residente sa Purok 5 Ilonggo Village, Barangay Tibal-og. Matud sa amahan sa bata ngadto sa kapulisan, migawas ang iyang anak pasado alas 6 sa gabii niadtong Oktubre 2 aron maligo sa ulan kauban ang iyang mga higala, apan wala na kini nakauli.

Tungod sa kabalaka, nangita dayon ang pamilya sa bata, ilabina kay misaka ang tubig sa sapa duol sa ilang balay tungod sa kusog nga ulan. Alas 5 sa kaadlawon, namatikdan ni Elberto Labial, 24 anyos, ang lawas sa bata nga nasangit sa usa ka improvised nga tulay samtang padulong siya sa pagkuha og tubig.

Gidala ang bata sa Santo Tomas Municipal Health Station alang sa eksaminasyon, apan gideklarar sa attending physician nga dead on arrival o DOA. Nagpadayon ang imbestigasyon sa Santo Tomas Municipal Police Station kalabot sa insidente.

RadyoMaN Kareen Beltran