Kalibo, Aklan — Nagapaeaea ag nagapaeanakit ro kaeawasan it sangka 37-anyos nga babaye matapos nga bakoeon it gatong ko anang ka live-in partner ko Lunes it aga-aga sa Sitio Guba, Brgy. Tigayon, Kalibo, Aklan.
Ro nasambit nga babaye hay si alyas Joylen it Purok 3, C. Laserna St .nga nakaangkon it lastro sa siki, alima, hita ag likod rong naangkon samtang ro anang live-in partner hay nakilaea kay alyas Jorry.
Suno sa biktima nga bago natabo rong pagpamakoe hay rayang si Jorry may ginabantayan nga uling ag samtang naga bantay anang ginsampit ro biktima nga ibahan imaw, pagkatapos hay nag bakae imaw it sangka bote ag nag inum-inum.
Tag naubos ro sangka bote, naghambe si Jorry nga madugang ugaling ro biktima hay nagbalibad ay naduyog eot-a imaw, pero nagbakae gihapon si Jorry pero ro biktima sumueod sa kwarto para magkatueog.
Maangan angan rayang si Jorry hay sumueod sa kwarto, ginpukaw ro biktima ag ginbinuslahan na ko mga nagtaliwan nga mga uwat sayod ag samtang nagahinambae imaw ana nga ginabinakoe it gatong ro biktima.
Samtang ginabakoe imaw ni Jorry hay una man ro daywa nandang ka unga nagapamantaw ag nagatinangis.
Dugang pa it biktima nga bukon eang it raya ro unang beses nga imaw ginsakit, ana nga ginpasensyahan kunta dahil uwa imaw naila nag magbueag sanda ag may kilaean on nga ama ro andang mga unga ugaling makaron hay indi eon gid nana matiis ag naka desisyon eon lang imaw nga bueagan raya.
Sa makaron hay nagapangatubang it kasong pag bayolar sa RA 9262 rong nasambit nga suspek.
