Malaybalay City, Bukidnon – Gipahingusgan sa Department of Interior and Local Government kon DILG Bukidnon ang Barangay Anti-Drug Abuse Council kon BADAC.
Sa interview sa RMN Malaybalay ngadto kang DILG Bukidnon Provincial Director Bruce Colao gibutyag niini nga usa sa ilang gipapakusog ang BADAC aron mas mudaghan na unya ang mga madeklara nga Drug Cleared.
Nasayran nga dili pa lamang dugay gipasidungan sa DILG Bukidnon ug ni Governor Jose Maria R. Zubiri, Jr., ug gihatagan sa certificates of recognition ang 21 ka mga drug cleared barangays sa probinsya.
Dungan niini nanawagan ang provincial government sa mga barangay officials nga himoon ang ilang katungdanan ug mutabang sa pakigbatok sa illegal nga droga.
Matud sa provincial director nga gi-certify kini sa PNP, ug gi-verify usab sa PDEA ang pagdeklara sa barangay drug cleared.
Nanghinaut usab kini nga unta mahimo kining sumbanan ug hagit sa uban pang barangay sa Bukidnon nga maningkamot aron malimpiyuhan ang barangay gikan sa illegal nga droga.
Nasayran nga sa 464 ka barangay sa Bukidnon, anaa pa sa 21 ang nadeklerang drug cleared.
