Kalibo, Aklan — Indi pa masayuran kung pila gid tanan rong kabilugan nga balor it nagkaeaduea sa panimaeay ni Mr. Apol Zaraspe nga nahamtang sa may Acevedo St. corner J. Magno St. matapos nga sudlon it manakaw kaina it aga-aga.
Sa pakikipag-angot it RMN Kalibo kay Mr. Zaraspe nga kaina it mg alas tres rong aga-aga hay nahabugtaw imaw para kunta mag-ihi pero bago imaw mag adto sa CR hay anan nga gintan-aw ro anang cellphone ugaling uwa nana makita ag ana eamang gina eauman nga basi nahueog malang sa kilid it anang eogban.
Pagbalik nana hay ana nga napan-uhan nga ro anang sling bag hay uwa eot-a ag rikato imaw naalarma, kung sa siin nasayuran nga imaw tinakawan.
Suno kana rong sueod it anang sling bag hay ro ana nga service firearm nga calibre 45, dollars nga $4,200, cash nga more or less 130,000 pesos, naduea man ro anang daywa ka cellphone ag relo nga Rolex nga nagabalor it more or less 800,000 to 1 milyon pesos.
Sa inisyal nga imbestigasyon it mga kapulisan nga sa likod nga parte it baeay nag-agi rong manakaw.
Kitaon man sa CCTV footage rong pagsueod ko nasambit nga manakaw ag buyot eon makaron ko mga taga Kalibo PNP.
Si Mr. Zaraspe hay rong CEO it Energy FM.
Padayon pa sa gihapon rong imbestigasyon it mga taga SOCO ag Kalibo PNP angot sa nasambit nga insidente.
