Davao City – Midepensa karon ang organizer sa ‘Indak-Indak sa Kadayawan 2019’ sa pagka-kampeon sa Bislig Surigao Contingent alang sa Open Category sa bag-ohay pa lamang nahuman nga street dancing competition sa Kadayawan Festival.
Matud ni Indak-Indak Kadayawan 2019 Organizer Harold Quibete, walay nahimong nga kalapasan sa mga Criteria for Judging ang Bislig contingent sarang mamahimong babag aron hukasan sila sa dungog kun kadaugan sa naasoyng kompetisyon.
Kini human mialma ang National Commission on Indigenous People Caraga Region sa bahag attire nga gisuot sa mga dancers sa Bislig Contingent isip nagpresenta sa tribung Manobo sa rehiyon sa caraga.
Ang major criteria sa Indak-indak nagkanayon nga may kagawasan ang matag contingent sa pagpili sa tribu nga ilang dad-on kun i-presenta sa Grand Showdown sa indigay apan puwede usab nga dili magbitbit og tribu.
Gipasabot ni Quibete nga ang pagsuot og bahag sa mga dancers sa Bislig contingent wala nagpresenta sa usa ka tino nga grupo sa mga lumad sama sa Manobo o Mandaya or kadtong may kagikan sa Caraga Region.
Dugang ni Quibete, ang Bislig contingent mi-kampeon sa mga indiganay didto sa Sugbo ug Caraga Region una pa man sila nisalmot sa Indak-Indak sa Kadayawan.
Giawhag ni Quibete ang mga kritiko nga una magyawyaw kun manita, sutaon una ang hingpit nga mga criteria nga gihimong basehan sa Board of Judges sa pagdeklara nga kampeon sa Bislig contingent.
RadyoMaN Joel Viray
