Boluntaryong pagsuot sa facemask dili pa i-adopt sa Davao, ubang LGUs obserbahan

30
Davao City – Wala pay planong i-adopt sa City Government of Davao ang boluntaryo nga pagsuot og face mask sa gawas subay sa rekomendasyon sa Inter-Agency Task Force (IATF).

Gisaysay ni Davao City Mayor Sebastian “Baste” Duterte (sa interbyu sa city-owned radio), buot niining paunahon una ang ubang Local Government Units (LGUs) sa pagpatuman niini aron masayran kung kini epektibo ba ug dili mamahimong risgo sa katawhan.

“Gusto man gud nako nga kadtong mga probinsya, mga munisipyo, mga ubang syudad nga dili na mag-face mask, gusto nako tan-awon unsa usay mahitabo ato nila. Og makita nakita nato gani nga okay sila, diha pa ‘ta musunod. Pero dili nako gusto nga mag una-una ‘ta,” sulti ni Baste.

Dugang sa alkalde, suportado niya ang plano sa City Health Office (CHO) nga padayon ang istriktong pagpatuman sa pagsuot og face mask hangtud nga mahuman ning tuiga samtang ginaobserbahan ang ubang LGUs sa optional nga pagsuot og face mask sa gawas (open spaces).

RadyoMaN Kirby Manzon

Facebook Comments