Pinalalakas ng lokal na pamahalaan ng San Jacinto, Pangasinan, ang pagmamanman sa mga lugar na madalas bahain sa pamamagitan ng pagkakabit ng mga CCTV camera na may solar-powered lights sa mga natukoy na flood-prone area, ilog, at tulay sa iba’t ibang barangay ng bayan.
Pinangunahan ang inisyatibang ito ni Mayor Leo F. De Vera, chairman ng Municipal Disaster Risk Reduction and Management Council o MDRRMC, kasama si MDRRM Officer Lilibeth P. Sison, bilang bahagi ng mga hakbang upang palakasin ang kahandaan sa sakuna at pagtugon sa mga emergency.
Layunin ng proyekto na mapahusay ang pagmamanman sa kondisyon ng mga ilog at pagbabago ng lebel ng tubig, gayundin ang maagang pagtukoy sa posibleng pagbaha, lalo na sa panahon ng malakas na pag-ulan at masamang lagay ng panahon.
Sa tulong ng mga CCTV camera, magagawa ng mga kinauukulang responder na malayuang masubaybayan ang kalagayan ng mga binabantayang lugar at masuri ang sitwasyon upang maiplano ang mga kinakailangang hakbang.
Inaasahang makatutulong ang sistemang ito sa pagbabawas ng panganib sa buhay at ari-arian ng mga residente sa pamamagitan ng mas maagap na pagmamanman at pagtugon sa posibleng pagbaha. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
